&&&فاقد حنان في كوكب زحل &&&

]السلام عليكم

عزيزي المشاهد ان الادارة لاتمنع ان يكتب اي احد من الاعضاء تجربة مر بها في حياته ووشاف منها الويل . فليكن ديدننا واحد ولنكتب مايحصل لنا بصراحة حتة لو كنت متمرمط عااادي صح بيضحكون عليك الناس بس طنش واللي له ريال ياخذ 1000 مهب عشره


نبذه عن حياتي هع هع هع هع

<<< اخس يا الزير سالم



المهم خلونا في الحتوته

تقول الحتوته


عندما حزّمت أمتعتي وربطّت قشّي كما تربّط السيرلانكيّة أمتعتها عندما تذهب الى المطار (( على طاري سفر الشغالات ...ما تلاحظون ان الشغالات اذا بغن يسافرن تلقون في شناطهن حاجات عجيبه مثل ملعقه، لعبة بزارين هريانه،شايب الهاص....ماعلينا)) و فعلا قررت أن أسافر في اجازة الصيف الى الطائف لكي أتصيّف فيها بعض الوقت وحسب ما سمعت فيها من مغريات سياحيّه جعلتني أغيّر من الاتجاه و أسافر الى الطائف بدلا من السفر الى المنطقه الشرقيّه لأنني أصبحت أعتبر نفسي من أهالي الشرقيّه من كثر ما أروح لها

وعلى ما سمعت أيضا أن الطائف يوجد بها سوبر ماركت كبير جدّا يثير تحفّظي الدائم في هذه الناحيه، فأنا من عشّاق التسوّق في السوبر ماركتات ذات البضائع الشامله <==لو بحلف انّك تروح تبرّد وترجع هع هع هع هع هع

وفعلا ذهبت الى المطار بعد أن تم توصيلي الى المطار بواسطة والدي و أخواني ووالدتي حفظهم الله ورعاهم في حلّهم و ترحالهم...
وحينما اقترب موعد الصعود الى الطائره بدأت والدتي بالبكاء بعد ان كانت خنقتها العبره ساعة و نصف وكأنّي سأسافر الى أدغال أفريقيا الخطره...

وعندما هممت للصعود الى الطائره زاد بكاء أهلي كلّهم ، وكل ما مشيت خطوه يزيد الصياح واذا وقفت مكاني ثبت الصوت واذا رجعت خطوه خف الصوت ، فما كان منّي الا أن بديت أهبل فيهم مرّه أتقدّم ومرّه أرجع عشان يزيد صوت الصياح و يخف ،وعندما زودتها و أنا استهبل على اهلي هاوشني الوالد وطلب منّي التوجّه الى البوابه قبل أن تفوتني الطائره......وفعلا توجّهت الى الطائره

وبعد أن ركبت الطائره و تهاوشت انا وواحد على الركوب عند الدريشه، وفعلا ركبت عند الدريشه بعد أن جعلت الطائره هيصه و زمبليطه ، وحوسه . وزيطه

الرجاء من الساده الركاب التزام مقاعدهم و ربط أحزمتهم استعدادا للاقلاع
وبعد ساعه كامله تأخرت فيها الطياره لأنّي ما ربطت حزامي....مدري كنت أتلكّع ولاّ انّي فعلا ما عرفت اربط حزامي << بس الظاهر انه الثانية
المهم ربطت حزامي والمضيفه تقول بصوت عالي للمضيفه الثانيه : يالله ترى هالدلخ ربط حزامه قولوا للكابتن ان كانه يبي يمشي يتوكّل على الله << انا ماسمعته وهي تقول الدلخ ولا كان علكته .
ثم قامت المضيفه الأخرى من مقعدها وهي تقول بعد أن قامت بصعوبه:
يالله حسن الخاتمه ، يالله ابروح اقول له

وفعلا بدأت الطائره بالتوجّه الى مدرج الانطلاق ببطء شديد < نسوا يدهنون السيور

وبعد أن لفينا الى المدرج المطلوب بدأت الطائره بزيادة السرعه <<<<
نعم زادت سرعة الطائره أكثر فأكثر ((اسمع عجوز جنبي تقول لولدها :روح قول للسواق واناامّك لا يسرع ترا السرعه شينه))
وفعلا السرعه جنونيّه ونحن لم ننطلق


يا الهي...تأخر ما اقلع


وبعد أن اخذنا وقت وحنّا مسرعين خرجت اشاعه تقول ان الكابتن نام وهناك من يقول أن المحركات عطلانه ، وهناك من يقول ............

يا للهول ما هذا اننا في طريقنا الى الموت، ونحن في مشكله عصيبه وبعد لحظات وحنّا مسرعين بالطياره ، واذا باشاره بجانب صورة ربط الأحزمه مكتوب عليها : الكابتن نايم الرجاء عدم الازعاج، وجنبها صورة شعار سليب هاي خخخخخخخخخخ
يوم حسّيت انّي أمام تحدّي للوقت وحسّيت انّي لازم أسوّي شي وأقوم بدور الرجل الذي يريد المحافظه على سلامة الأرواح وفعلا قفزت من مقعدي ولكنّي وقعت في كرسيي لأني ما فكّيت الحزام ...وبعد أن فكّيته قفزت مرّة ثانيّه والطائره مسرعه جدا وفعلا ذهبت الى كابينة الكابتن و القياده ...وفعلت المستحيل لكي أوقظ هذا الكابتن وفعلا استيقظ ونقز هو الآخر الى أحد المحرّكات ووقّفه وفعلا استطاع ايقاف الطائره ولكن ....أين؟؟؟

وجدنا أنفسنا في الطريق الدائري...

((أعزائنا الركّاب ..نأسف للخلل الذي حصل ...وسنقوم بعد ساعه من الآن بالاقلاع مرّه أخرى ...شاكرين لكم محافظتكم على الهدوء))
حصلنا أنفسنا بالتحديد عند كبري اللسيب ،، وبعد أن تم طلب الدوريات الأمنيه لاخلاء الطريق الدائري ، فعلا قرر الكابتن الانطلاق مرّة أخرى بعد أن تأسف الكابتن للركاب عن الخطأ الفادح الذي ارتكبه
وبعد ذلك خرجت احدى المضيفات على المايكرفون تعتذر بلقافه :
نأسف للخلل وذلك كان بسبب أن الكابتن يعاني من لدغه من حشرة التسي تسي واللتي تجعل الشخص دائما بحاجه الى النوم
المهم بعد أن جلد الكابتن هذه المضيفه الملقوفه انطلقنا بحفظ الله و رعايته ماسكين الدائري لكي نطير بطائرتنا قاصدين الطايف
وفعلا اقلعت الطائره ....الطائره تقلع ..الطائره تقلع الى السماء...الطائره في ارتفاع ...الجميع في صمت ..ما زالت الطائره في ارتفاع بشكل رهيب...لم نعد نرى الأرض...يا الهي لماذا لم تعتدل الطائره...ما زلنا في ارتفاع و كأننا قاصدين الخروج من الغلاف الجوّي :avion:

ما هذا الكابتن النكبه؟؟؟ هذا السؤال في خاطر جميع الركّاب...
اننا في مأزق ألعن من اللي قبله..بدأنا نحس أننا خارج نطاق الكره الأرضيّه...
مرّة أخرى اللمبه اللي فوق المقاعد تضيء مكتوب عليها :
الكابتن نايم الرجاء عدم الازعاج، وصورة سليب هاي
هالمرّه قررت أن أحسم الموضوع حسما نهائيّا ...وأقفز من مقعدي قفزه ،وكما هي دلاختي سقطت لأني ما فكّيت الحزام ،( خلاص عاد مهب حلا ) وأفكّه ثانيه وانطلق متجها الى كابينة هالأرفل النكبه...
و أروح وأنا أركض الى الكابينه يوم وصلت باب الكابينه والقاه مقفول ...واسمع الكابتن يشاخر...
واطق الباب بققووووة...محد لمّك...
و اطل مع الدريشه والقانا كافخين ولان الجو برّا كل شوي يتغيّر مرّه زهري مرّه بنّي ...
واشوف مخلوقات عجيبه و أشكال غريبه تمر من جنب الطياره ...
وأناظر مع الدريشه مرّه ثانيه...والا والله متوجهين لكوكب صغير نبي نصدمه ( قلت لا لا لا هالوضع ماينسكت عليه ابد لازم يقوم هالعنز لايورطنا ) وأطق على راعي النوم هالمهبول الين فتح الباب وهو لابس قميص نوم ((جلابيه)) وعيونه فيها غمص تقول حبه برتقال ابو صرة..

وعقب ما لعنت ابو خامسه على الورطه اللي ورطنا أيّاها ....قام يهدي الطياره الين وقفنا على سطح الكوكب...يوم طالع الكابتن واثره ما معنا بنزين
وننزل من الطياره نندب حظّنا العاثر...وننتظر الموت ...
ووجدنا لوحه مكتوب عليها :

مرحبا بكم في زحل


( وهنا بدأت الاجبنه تتصبب عرقاً وملحاً )



:dribble:






( فاصل اعلاني ونواصل )


مجموعة صالح الدريبي


قــــــــــــــــوة العـــبــــور الى الـــغـــد


أمحق غد





بـــيــــبــــسي


تششششش << واحد يفتح علبة ببسي

ققققققققققق << برضه واحد يشرب ببسي

وواحد بجنبه يقوله عطن جغمه




فــــــــــــــورد

سيارة العائلة

في الحل والترحال

تتمتع بقوتها ومتانتها وجمالها وتراك تقدر تكشت عليها
بس اذا منك رجعت ازرق به الصناعية الله لايهينك








(

( عــــدنا والعـــود أحمــــد )< ------ متأثر بدعاية space toon



هع هع هع هع هع هع



نعم اننا في زحل


المهم في عز روعتنا و سباهتنا وطيران عيوننا ونحن نشاهد كوكب زحل تاره، ونفكّر في مصيرنا تارة أخرى
اننا في مأزق
وكل شوي يلتفت واحد على الكابتن يا يسطره كف ولاّ بقس أو سوبلكس خلفي...فما يكون من الكابتن الاّ انّه يلقم الكف ثمّن ينام شوي وهو يقول يا جماعه الصباح رباح...

وحنّا في عز حوستنا واذا بأحد المخلوقات العجيبه يمر بمحاذاتنا وكان شكله عجيب، اذ كان له ثلاثة أرجل ويد واحده و عينين وحده أكبر من الثانيه وخشمين وطوله لا يتعدّى طول الكرسي اللي أنا جالس عليه الحين...وله أريل(أنتل) فوق راسه ،ولونه بنفسجي

في هاللحظه كل ركّاب الطياره اللي نزلوا رجعوا للطيارة مرّة ثانيّه واللتي كانت تبعد عنّا حوالي كيلو متر ، ولا أنكر أنني كنت آخر واحد يهرب من هذا المخلوق العجيب ، لكنّي أوّل من وصل الى الطياره بفظل ذراقتي الزايده...
المهم في الموضوع ونركب الطياره ونصك علينا الباب ويمر هالمخلوق من عندنا وهو يناظر ومستغرب ...
ويرفع راسه ويقول :يا ركّاب الطائره ، من أنتم من الشعوب، وهل أنتم أعداء أم أحباب، وكيف وصلتم الى هنا؟؟
فزاد تعجبنا عندما تحدّث هذا المخلوق العجيب...
فقال مرّة أخرى:
هل من أحد حكيم لديكم لكي ينزل ليحدثني ؟؟؟
عندها وجدت نفسي أكثر ركاب الطائره حكمه فنزلت لكي أحادث هذا المخلوق...
وفعلا نزلت...
<<<<<< اي هين حكيم الا صتيمتن تمشي
وعندها قال لي:أهلا بك ...من أين أتيتم ..وما هومقصدكم ...وكيف نزلتم ...؟؟؟
قلت له :

والله يابو الشباب ( لاحظوا اللكاعه) نحن من أهل الأرض، وانا اسمي فاقد حنان الاسترالي << (زين اسمك انت وخشتك)..ونريد بقعة في الأرض ولكن الكابتن نام ووصلنا هنا بالغلط...
فقال لي :كما عرفت أن أرضكم مقسّمه الى قارّات و أقاليم وحدود ...فمن أيّها أنتم....
فقلت له:والله حنّا من السعوديّه...(والله عباطة فاقد حنان وفي استراليا وجاي من السعودية ومشت عليه!!!!!!!!!)
فقال لي :
لا أعرفها ولكن هذه خريطة الأرض ....بامكانك أن تشير على منطقتكم ...
فأشرت عليها ..
فقال:آهاااااا أنتم شعب المثلوثه.. ههههههههه :
( اثاري كل الدنيا تعرف المثلوثه )
فقلت :وش مثلوثته الله يصلحك....
فقال مستخفّا دمه وسط هذه الظروف السيئه:ولماذا لا تتاجرون في المربوعه و المخموسه و المسدوسه ...وعندها ضحك ضحكا عنيفا
فقلت له و الشر يقطر من عيني بسبب ملاغته ودلاخته :ترا الملاغه سبب رئيسي لنفور الناس وبعدين انتبه لاتفصخ كرشتك من شدة الضحك .الحين ورا ما تشوف لنا حل في مصيبتنا ...وتشوف لنا بنزين نعبّي فيه طيارتنا ..
فقال :نعم ...ماذا ينقصكم هل تريدون وقودا للطائره...سأحظر الوقود خلال لحظات.
المهم جاب البنزين وقعدنا ساعتين ندوّر محقان ..المهم بدا يسب أهل الأرض ويقول أنتم عندكم عنصريّه وعندكم وعندكم....

<<< ساكت ويتبع المثل ( اذا صار لك عند ال...... حاجه قله ياسيدي )

قلت والله الأشياء هذي تلقاها في كل مكان موب بس في الأرض...
فرد علي وهو يقول أصلا أنت المفروض ما تتكلّم..
قلت ليش يا الحبيب ..
فقال :
لأنكم عرب والعرب خوافين ...؟؟؟؟؟؟؟؟؟؟
قلت لا لو سمحت لا تخطي علينا ...
قال :
حلّيتوا قضيتكم ..ولاّ لا
قلت : أي قضيّه..
قال :
كلّمني واحد من الزملا ( حلوه الزملاء والله لو انه مراسل الجزيره ) أن عندكم أرض مقدّسه تسمّى فلسطين .....و أن فيه دوله ناهبة أرضكم ، وانتم فوق عشرين دوله ما قدرتوا تورّون اهل الأرض أنكم أصحاب حق وتاخذونها ولو بالقوّه..
فتلعثمت ..وصرّفت السالفه...
المهم يوم عبّينا الطياره وقود وقرّرنا الرحيل ...شكرته وقلت له :
يا أخ زحلي ممكن طلب أخير....
فقال :لا حول ولاقوّة الاّ بالله ...هاه وش تبي بعد...
فقلت له :
الحقيقه الاحمال معنا في الطيّاره واجد والأمتعه لا تحتملها الطائره بمشوار ثاني الى الأرض..
فقال :
والمطلوب
قلت:
اننا نبي نرمي بعض العفش عندكم في زحل ..
فقال :
لا ما فيه أمل توصخون كوكبنا يا الارضيين..
فقلت :
طيب خلّها عندك ، اذا جينا مرّة ثانيه ناخذها ..
فقال :
واذا ما جيتوا ....اسمعني يافاقد افندي,انت سمعت أغنيّة محمد عبده اللي عندكم واللي يقول فيها / لا تردّين الرسايل ويش أسوّي بالورق...اذا كان يبتلش بالورق ، ألا تريدني أن أبتلش بعفشكم..
وعندها بدا يتميلغ شوي وسط احتراق داخلي منّي ..
المهم قال يالله عاد عطيتكم وجه وانا الحين أبامشي..
وانا أقول في نفسي :
انقلع ، ما طاح من الزباله أخف على البلديّه
<<< خربها هههههههههههه
وشغلنا طيّارتنا ومشينا وفعلا وصلنا الأرض بعد أن قاوم كابتنّا النوم بصعوبه ...
وعندها وجدنا أنفسنا مثل أبطال طاش ما طاش ، لقد اختفينا عن الأرض حوالي عشر سنوات ...
وعندها ذهبت الى بيتنا <<<< هع هع هع هع
وعندما دخلت الى البيت وجدت والدي قد خرّف ووجدتّه يلعب فوق الدربزين,,,
وذهبت الى والدتي في المطبخ معتقدّا انّها سترحّب بي وتبكي ولكنّها قالت :
وينك واناامّك اتصلوا عليك عالم وانت في الطايف،وواحد من ربعك يقول ولدكم تاركن الدايره من مبطي قولوله اذا جا لايقبل علينا الا بحاشي وبعدين وراك تقول بجلس شهر في الطايف و تجلس فوق عشر سنين
قلت ياميمتي صارت لي قصة طويلة عريضه خل انام واقوله لك وفعلا قلت لامي وابوي القصة وحتى التلفزيون سجلوا قصتي يقولون نبي نزين مسلسل لعيونك . وابشركم ربعي تنازلوا مايبون حاشي والا كان تدبسنا
الحمد لله على كل حال
.....




تقبلووو تحياتي

والقادم اكثر

هههههههههههههههههههااااااااااااااااااااااااااااااااييي

الله يرجك مت من الضحك اهل البيت قامو من الضحك...

الله يعطيك العافية....................

ويرجك ياختي


حرام عليك تقومين اهل البيت من نومه همن يدعون علي


ويعافيك

يارب الضحكة دوووم ماتفارق محياك

سلمت اخيتي على مرورك

والف مبروك الرقابه يمكن جت متأخره بس توني ادري والله

تستاهلين يافرووحة



لاعدمة اطلالتك في صفحاتي دائما

دي علاكمـ ياربع ماي كش كــــــــش





الله يقطع بليســـــــــــــكـ جت امي تقول وش به ذي؟


>> يحسبونه مهبولـــــــه



بس اسحـــــــــــــن شي الدعايات >> تحبهــــــن



بس قصــــــــمـ إنك تســـــــــــــــــــــــــــــذا



يعطيكـ المرسي والثانكــــــــس


كثرمنهن>> جازهـ له الوضــــــع



أوخيتك الصغنونــــــــــــــــــــــــــه




أم الهتســــــــــــــــــــــــــــــــي

حوؤؤؤؤؤؤؤؤؤؤؤؤؤؤؤؤؤؤؤؤؤ


هههههههههههههههههههههههههههههههههههههههههههههههههههههههههههه هههههههههههههههههههههههههههههههههههههههههههههههه




قسم باللله منتهي


اما الدععااااايت بالحالللللللللللللللله