قصيده لشاب فقد امه

القلب يحزن والمدامع غزيرة = وفي جوفي نار مـن لهبهـا تباكيـت
والدار ظلمة كانت أمي تنيره = يايمة وينك من دونـك خلـى البيـت
قلبي تفطر على الفرقـى المريرة = أمنـت بالله وبقـداره تراضيـت
الموت حقن وكلن له مصيره = وموت النبي قبلـك يايمـة تعزيـت
هذا جلالك وريحك في عبيره = كل يوم أشمه وليـا شفتـه تهنيـت
صوتـك يايمـة يامحلـى أثيره = وحنانـك يمـه يخلنـي تفديـت
من يوم رحت والمشاعر أسيرة = محدن افضفض له وبصمتي تسجيت
يايمه منه أجي واستشيره = يعدلني لـي شفـت الصـواب وتنحيـت
يايمه كلن يناظر في حيرة = من يوم رحتي وانا اللـي مـا تواسيـت
أجي دويخ في وقت الظهيرة = محـدن سـأل عنـي يقـول تغديـت
وابيـت ليلـي وعيونـي سهيرة = وكـم الليالـي نايـم ماتعشيـت
ظروفن يمـه تواجهنـي عسيرة = الشكـوى لله بظروفـي تعنيـت
يوم كنتي عندي وكني أمير ديرة = كلن يناديني ويقول لي تعال هيت
ويوم رحت يمه وكني في جزيرة = وحيدن فيها عن الناس تواريـت
ياكم تعلمت من معانـي غزيرة = يامنهـل التعليـم منـك تربيـت
كم قصة قلت وللماضين سيرة = ولي جيت عندك بسواليـف تسليـت
أه يايمـه لنظراتـي الأخيرة = مليـت كفـي ترابـن ثـم حثـيـت
ابشري يمه بدعـوات كثيرة = كلمـا ذكرتـك وللرحمـن صليـت