انا والرومانسيه قصه عجلت بوفاه حسين فهمي ,,,

**تمساح احمـــــــــــر** · 10-25-2006, 09:34 PM

السلام عليكم ورحمه الله وربركاته

بلا مقدمات وأقولكم سالفتي من يوم الميلاد إلى يومكم هذا
وبدخل بالسالفه على طول لأني لو سولفت مب أزين لكم

هالرومانسيه ذي هي بالتحديد خصمي وعدوي اللدود

عجزت أصير رومانسي <<حاولت بس ياشين السرج على (...........)؟

خلون اقص لكم سالفتي مع هالرومانسيه

من صغري وأنا متربي مع تماسيح مابـوهـ ولا سحليه تلطف البيت وتخليه هادي

بس مصافق أنا وأخواني وهوشات وحياتنا كله

كوره بس <<خبركم هاللعبه مابش عنف بس مضارب وصياح ونياح

وأمي يابعد هالدنيا هبلنا به

ماتسمع الا يمه شوفي ضربـ(ن) ,,,يمه شوفي شاتـ(ن) ,,يمه شوفي مزعـ(ن)** بالكوره ,,يمه مالعبـ(ن)

ودواليك ودواليك <<مهب بمكانه هاللكلمه تصلح بالقسم العام

المهم أثرت هذي الحياة على رومانسيتي وحاولت اتقرب لـ(ـه) (الهـاء تعـود على رومانسيتي ) بس هي ماله خلقي

عشت حياتي ولله الحمد وتعرفون جاء الزواج ولازم أتعلم

وللمره المليون وبنجاح منقطع النظير فشلت فشل( ذريع ) بالتعلم
( دايم أسمع بالكلمه وأتحيّن الفرصه علشان أقوله )( حتى كلمة أتحيّن كنت أحتري الفرصه << ياخي من زمان قلنا أحتري ولا تكثر القرق )

ايوه وين وصلنا وصلنا لـذريع <<ملاحظين اني متمسك بالكلمات حقات ذاك القسم اللي يسمونه العام

# قـفـله #

ادعوا تكفون للمدام بالثبات

والله وسرقنا حركات صوت المطر

ياناس اذا جيت اعبر عن عواطفي الجياشه تجاهه اضربه

واذا جتـ(ن) لحظة حب قبصته **

والمسكينه ماغير تمر وتناظر(ن) <<تخاف من كف والا صقعه مع الراس

ترى هذا الحــــب (حقي )

مرت الأيام

ومرت

..
.

انطبق المثل اللي يقول :

علمته الرمايه فلم اشتد ساعده رماني

صرت أنا اللحين اخاف

ايه هذا اللي صار البنت انهبلت علي وصارت هي اللي تضربن <<لايجين احد يقول رخمه

صرت امشي واباري الساس**

عرفَتْ لي وصارت تشوتـ(ن) على الدخله والطلعه <<طبعاً من باب الرومانسيه حقتي

ومره من المرات قلت ابسوي نفسي اتكيت <<تكفون صح هالكلمه والا لا

قلت ابجيب عطر أو هديه <<سمعت ان هالشئ من حركات الرومانسيه

والله وأجي من السفر ,, كنت رايح للرياض

والعطر حاطه بشنطتي اللي كانت بشنطة السياره << يسمع بالهديه خايف احد يشوفه وهو مالمه احد

يوم وصلت واقول للمدام تراي جايب لـ(تس) هديه << لا تقولون صرم مايطلع الريال بس ماش رومانسيه

انبسطت واسفهلت وقلت وش هالتغير الرهيب والمفاجئ انت اللي ماعمرك
جبت لي ورده تجيب هديه

المهم وتتساقط من عيناها دموع من الفرحه <<الله يجزيه الجنه

واطلع الشنطه بكل ثقه ( تعرفون الواحـد بهالمواقف يحب يتميلح )

واطلع الهديه مغلفه وحركات المصاريه (غمضي وما غمضي مع اني اذكر هالحركات تسوى بالدبله والعقود والذهب ) بس قلت يله وش اسوي

المهم فكت الهديه

( احس انكم تحمستوا )<<<< مصدق انه راعي اثاره

وفتحت الكرتون وقعدت تناظر

وتــــــأتي الصاعقه

وتصرخ

مابـوهـ الا قزاز متكســــــــر

وانا انط قلت وشو

يوم ناظرت اثره صدق قزاز متكسر

اثري انا وجبهتي حاطه بالشنطه 3 ايام والرياض تعرفون شمسه مهب قويه أبد

والدليل

انه تكسر القزاز وتبخر العطر المزعوم انه هديه

ومن يومه ايقنت المدام وبما لايدعو للشك اني مانيب حول هالرومانسيه ومن جنبه

وصرت

اذا بغيت اجيب هديه اخذه معي واقول اختاري هديـ(ـتس) واروح واشريه من بكرى
واجي واقوله بالكنه القصيميه ( تسنتس ماتدرين )

وصرت مانيب حاجه للرومانسيه ذي

هذا سالفه من سوالفي اللي صارت <<مسوي الشرهان

وحبيت امتعكم اذا كانت بتمتعكم

وشكرا

معاني المفردات

مزعـ(ن) : ركل الكوره بقوهـ شديدهـ يسمع لصعتها بالظهر كل من في الأرض ومعهم الثقلين

قبصتـه : وتسمى المرد ,, وفي أقوال أخرى هي إغلاق الأصبعين السبابه والإبهام على منطقه معينه من أنحاء الجسم ,, وتؤدي تلوين تلك المنطقه بألوان الطيف (( أحمر وأزرق وأخضر ,, وأحياناً بنفسجي ))

الساس : وهو الجدار ,, ومايحتاج أكثر من كذا فلسفه

**RaiN vOicE** · 10-25-2006, 10:06 PM

اقتباس:


	من صغري وأنا متربي مع تماسيح مابـوهـ ولا سحليه تلطف البيت وتخليه هادي بس مصافق أنا وأخواني وهوشات وحياتنا كله كوره بس

ومع أول اقتباس وعليكم السلام ورحمة الله وبركاته

وأقولك الحال من بعضه ياعمنا الأحمر

اقتباس:


	عشت حياتي ولله الحمد وتعرفون جاء الزواج ولازم أتعلم

ماشاء الله
الله يوفدزك ,, ادع لنا نسوي سواتك بس

اقتباس:


	# قـفـله # ادعوا تكفون للمدام بالثبات والله وسرقنا حركات صوت المطر

هههههههههههههههههههههههههههههه الله يوفدزكم ,,

وعادي ياعم أنا كلي لك

اقتباس:


	ياناس اذا جيت اعبر عن عواطفي الجياشه تجاهه اضربه

توي أقتنع ان دربك ودرب الرومانسيه مهب لم بعض

اقتباس:


	انطبق المثل اللي يقول : علمته الرمايه فلم اشتد ساعده رماني صرت أنا اللحين اخاف

بعذرهـ يحوول

لو أنا مكانه لعنتك لعن

اقتباس:


	اتكيت <<تكفون صح هالكلمه والا لا

الصراحه مدري ,, اترك المجال للأخوهـ المتخصصين

اقتباس:


	المهم وتتساقط من عيناها دموع من الفرحه <<الله يجزيه الجنه

آمين يارب ,, ويجزاك الجنه انت بعد ووالديك والمسلمين

اقتباس:


	اذا بغيت اجيب هديه اخذه معي واقول اختاري هديـ(ـتس) واروح واشريه من بكرى واجي واقوله بالكنه القصيميه ( تسنتس ماتدرين )

يابطل أنت ,, من زماان الله يعافيك ههههههههههههههههههههههههههههههههههههههههههههه

اقتباس:


	وحبيت امتعكم اذا كانت بتمتعكم

عن نفسي الله يوسع صدرك بالعافيه

اقتباس:


	معاني المفردات مزعـ(ن) : ركل الكوره بقوهـ شديدهـ يسمع لصعتها بالظهر كل من في الأرض ومعهم الثقلين قبصتـه : وتسمى المرد ,, وفي أقوال أخرى هي إغلاق الأصبعين السبابه والإبهام على منطقه معينه من أنحاء الجسم ,, وتؤدي تلوين تلك المنطقه بألوان الطيف (( أحمر وأزرق وأخضر ,, وأحياناً بنفسجي )) الساس : وهو الجدار ,, ومايحتاج أكثر من كذا فلسفه

مخالف أقفل

والا أقولك لا تعليق

تدري أبقفل والشكوى لله

# قفله #
أشوف اسمك أنواع التناقض
يعني تمساح

وأحمر من الشطانه والا ايقالك بناتي

ماصرت أعرف انت صز رومانسي والا تمزح

بس الصراحه موضوعك متعوب عليه وتستاهل كل شكر عليه ياحبيلك هههههههههههههههههههههههههههههههههه

اقتباس:


	هذا سالفه من سوالفي اللي صارت

أنتظر منك باقي السواليف

بحفظ الرحمن

**فرووحة** · 10-26-2006, 03:17 AM

هههههههههههاااااااااااااااااااااااااااااي تمساح احمر

الله يرجك من جد ما بوه عندك رومانسيه خااااااااااااااااااااالص

**ابو كِندا** · 10-26-2006, 08:52 PM

الله يعيك الف عافيه

والله حلو موضوعك وسواليـــــــــــــــــــــــــــــــــــــــــــــفك

والا ذبحني ودمعت عيوني من الضحك

معاني المفردات

واللي هل بي الله يرجك

اقتباس:

مزعـ(ن) : ركل الكوره بقوهـ شديدهـ يسمع لصعتها بالظهر كل من في الأرض ومعهم الثقلين

والله ماقصرت

وموهبتك حلوه ويبيلها تبني

وننتظر جديدك

**الشيطاني** · 10-27-2006, 04:17 PM

ههههههههههههههههههههههههههههههههههههههههههههههه
هههههههههههههههههههههههههههههههههههههههههههههههه
ههههههههههههههههههههههههههههههههههههههههههههههههه
هههههههههههههههههههههههههههههههههههههههههههههههههه

الله يرجك ياتمساح احمر لين تغدي تمساح ازرق << هلالي

الصراحه قصتك مصرقعه لدرجة اني قعدت اقراه وانا منبطح من الوناسه

تقل اناظر فلم كرتون توم وجيري اصدقائي بس ابقولك شي عاد الرومنسيه وانا

صديقك يبيله يعني لاتحاول تداحم شي مهوب لك لان الرومنسيه غريزه عند الانسان

ونحن الشعب اللبناني ابخص بهالمور يعني اذا بغيت تستشير عن شي

ارسلي رساله بالخاص وانا بعلمك وش تسوي مع مدامك

وه بس تعبت وانا اقرق يالله ان تخلين لي وتسلمن شف الرومنسيه

استحي من نفسي الله يخلين بس

وه بس مشكور اخوي تمساح احمر على القصه الرائعه وان شاء الله نشوف ابداعك

بصفحات هذا المنتدى المبجل والله يخليك ويستر عليك << بتل يدعي تقل عجيز

ههههههههههههههههههههههههه