يقول من عدى على راس عالي *** رجم طويل يدهله كل قرناس
في راس مرجوم عسير المنالي *** يشتاق له مندق بالقلب هوجاس
قعدت في راسه وحيد لحالي *** والقلب في لجات الافكارغطاس
قعدت أعد ايامها والليالي *** دنيا تقلب ماعرفنا لها قياس
ياما هفت به من رجال مدالي *** ماكنهم ركبوا على قب الافراس
ولارددوا صم المك للتوالي *** ولاثار عج الخيل في كل مرواس
ولاقلطوهن للكمين الموالي *** ولاصار فوق ظهورهن شلع الانفاس
في حومة الهيجا لهن اجتوالي *** كل يبا من زاية الفعل نوماس
من بينهم عود الجنا والسلالي *** مثل البروق الليل الادماس
اقطعك دنيا مالها اول وتالي *** لو اضحكت تبكي وتوريك الاتعاس
يابجاد شب النار ودن الدلالي *** واكسر لنا يابجاد مايقعد الراس
فنجال يضيع ماتصور ببالي *** وروابع نضرب بها اخماس واسداس
لعل قصر مايجيله ضلالي *** ينهد من عالي مبانيه للساس
لاصار ماهو مدهل للرجال *** وملجا لمن هو يشكي الضيم والباس
بحسناك ما منشي حقوق الخيالي *** ياخالق اجناس ومفني اجناس
تجعل مقره دارس العهد بالي *** صحصاح دو خالي مابه اوناس
لاخاب ضنك بالرفيق الموالي *** مالك مشاريه على باقي الناس
وان ناشني من بعض الادنين صالي *** ماني عن الزلات مخبر وبلاس
كالعنبر الغالي بالاسواق غالي *** ولادرهم الفضيه على صفر ونحاس
اجزيه بالصدع جنوب وشمالي *** واتلى هوى قلبي اليا هب نسناس
المستريح اللي من المـقل خالي *** ماهو ولجات الهواجيس غطاس
ماهو بمثلي مشكلاته جلالي *** عجزت اسجلها بحبر وقرطاس
حملي ثقيل وشلت حملي لحالي ** ونصبر على ضيم الليالي والاتعاس
برسي كما ترسي عوال الجبالي *** ماينهزع حيد عليه القدم داس
متى تربع دارنا والمفالي *** تخضر فياضه عقب ماهي بيباس
وتشوف فيها الديدحان متوالي *** مثل الرعاف بخصر مدقوق الالعاس
ينثر على البيداء سوات الزوالي *** يشرق حماره شرقة الصبغ بالكاس
------------
وله ايضا :
الله من هم بـروحي سهجها *** بخافي ضميري في كنين الحشا لاج
احر من نار تواقد وهجها *** منها خطر روحي على سلك ديباج
وعين عسى المولى يعجل فرجها *** يفوح ناظرها كما عين هداج
استرسلت للدمع من مارهجها *** غيظ يكض عبارها مثل الامواج
كم واحد له غاية ماهرجها *** يكنها لو هو للادنين محتاج
يخاف من عوجا طوال عوجها *** هرجت قفا يركض بها كل هراج
يقضب عليك المخطيه من حججها *** حلو نباه وقلبه اسود من الصاج
الله خلق دنيا وساع فججها *** وعما يريب القلب لك كم منهاج
والرجل وان شطت لياليك سجها *** عسس تواليها تبشر بلافراج
-----------
واختم بهذه القصيده التي قال فيها السديري :
آه مـن دمع ٍ على خدي سفـح ** من فراق اللي على غيري شحيح
من فراقـه بالحشا قلبـي لفـح ** ساكن ٍ وسط الحشا حبه صحيح
من ربا صنعـا إلى غربـي رفـح ** ما سكن وسط الحشا غيره مليح
ان تعمدت الخطا عنـده صفـح ** خابـر ٍ قلبـي من اسبابه جريح
فـي غباب الحب انا قلبي طفـح ** هايـم ٍ ببحورهـا مـا يستريح
ريـح خلـّي مع هوى الغربي نفح ** مـن جـنان الخلد ريحه فيه ريح
----------
منقووول ...
الإهداءات
12-23-2006, 12:07 AM
من روائع شعر الامير محمدالاحمد السديري ...
