انواع الاحراج

التحية:
السلااام عليكم، ووالله ياهي برررررد، ماخليت شي ماتغطيت به، حتى جلال أمي، وحجاب الشغالة, حتى الفرشة اللي بحوض الوانيت..

طلب:
لا تشرهون على المصااااالة، لأنها بتحوم تسبوووودكم من كثرها

الحالة:
عندي امتحان بااااتسر، وغثتني ناموسة تدور فوق راسي، وأضربت عن المذاكرة، وكتبت هالموضوع، وإذا سمعتوا (وززززز وززززززززز) وسط الموضوع، ترا هذي الناموسة مهوب أنا<--بس عشان نكون واضحين مع بعض..

المقدمة:
كم من التحديات نواجهها في حياتنا، كثيرون هم من يقفون عند هذه التحديات، وقلة من الناس يواصلون المشوار..
فهناك طعس التحدي، وهناك تحدي الهرم، وهناك من يحدك في حارتكم و أحيانا عند باب بيتكم<--كم هو وسيع وجه

العلم(ويتخلله شي من قل الصدز):
الأسبوع اللي راح، دخلت مسجد الكلية أنا واثنين من المهبّل<--والفرق بين المهبّل والمتبّل حرف الهاء والتاء<--شكرا على المعلومة
المهم، قدموني أصلي الله يجزاهم خير، وأنا ماصدقت على الله أصير إمام، صليت بهم الظهر ساعة وربع، وأول ما جلست للتشهد الأخير، ويقول واحد منهم سبحان الله، وشكيت اني ماتوضيت، يوم سلمت، ويقول باقي ركعة، وأنا متأكد إني مصلي أربع، رديت عليه بكل عفوية:ملخّص صلاة الظهر اليوم<--دافووور والتلخيص كما تعلمون ناتج عن الملل من الشي اللي انت قاعد تسويه واللي يمل من قراية موضوعي أسمح له يلخّص
وطبعا كل هذا وأنا توني ما عطيتهم وجهي، يوم ديورت عليهم بسوبلكس خلفي، وإلى فيه صفين وراي، في هذه اللحظة، واجهت تحدي، وش السواة، وش السواة، أخبرهم اثنين اللي وراي وشلون صاروا صفين<--أمداهم يتوالدون، ولافيه بعض الناس يتكاثرون بالانقسام الخلوي مثل حراس مدارس البنات، تجيه اليوم توه متزوج، الأسبوع الجاي تجيه، وإلى فيه بزران يلعبون بساحة المدرسة بعد المغرب، تقول ما شاء الله هذولا عيالك، متى جو؟ يقولك بين صلاة العصر والمغرب

والله وأقعد مكاني وكل ما ناظرني واحد عطيته ذيك الابتسامة اللي بادية من رقبتي من كبرها. كان هذا قرار جرئ تغلبت فيه على نفسي وعلى خشتي اللي صارت حمرا تقل قارورة كتشب طاقتها الشمس بمرتبة كابريس صابونة بمواقف جامعة الملك سعود لمدة ترم و(ثلاث اسابيع من ترم صيفي) لأن راعي الكابريس الصابونة درس ثلاث أسابيع وحذف الصيفي وبعدين وقف سيارته بالكراج وسافر.

ومن تبعات الموقف<--متعوووب عليها تبعات
جاني دكتور مصري من أمتز الدكاترة<--أمتز يعني الممتازين شويين وهو واحد منهم
وقال:لما تصلي الصلاة مش كاملة اسمها قصر مش تلخيص، قلت له الله لا يلخص للعدو خير<--طبعا قلتها في قارورة نفسي، وقارورة نفسي مصنوعة من أجود أنواع الزجاج وتحتوي على مياه معدنية مقطرة مقري فيها<--يارب أصير عاقل، وأبطل استطراد، وطراد هذا رجال كريم وناره ما تطفي، إلى درجة إن الدفاع المدني فاتحين كشك عند بيتهم، ويقدّر عدد ضيوفه بحوالي ثمانمية وأربعين ألف زائر سنويا، يعني خلال خمس سنوات يصيرون كل سكان الرياض قد زاروه، وكل يوم يذبح ستة أفيال عشان يوجب الزوّار.

يعني تخيلوا إن الدكتور المصري قاعد يسمع كلامي عن القارورة والرجال الكريم، أنا متأكد إنه بينسى كل اللي درسه، ويقول لا عادت عليها كلية اللي جايبين هالطالب يلحس مخي، طيعوووووش<--صح إنه مصري بس إنه قد أبطى بالقصيم.

فاصل أدبي:
ياااه، كم أتمنى لو أطير وأحلق في فضاء القاعة، فأرى إجابات العيال في الامتحان اللي بعد كم ساعة، ثم أعود إلى ورقتي وأسلّمها فاضيةً، لأن الغش حرام. وكم أتمنى أن لا أمل من المذاكرة والدراسة، ولا أن تطق تسبدي، عندما أزفت في امتحان ما<--والما في لهجة أعالي نجد هو الماء والمياه، والمياه منها المعدنية ومنها المقري فيها مثل االلي بقارورة نفسي.

الاستنتاج:
1.إذا صار لك موقف محرج، خلك قد التحدي، وواجهه بابتسامة، عشان ما تصاب بالتوحد، لأنهم كلهم يضحكون عليك، لكن لو ضحكت معهم عليك، تصير أنت وياهم تضحكون عليك، وتصير مع الجماعة، والموت مع الجماعة رحمة، ويالله النجاة من النار.
2.إذا أحد سألك عن موقف، ولّا علّق، عطه سالفة طوييلة، مثل سالفة القارورة والرجال الكريم، ولا تحرير المرأة، ولا قيادة المرأة للسيارة، ولا الأسهم، والسوالف واااجد، عشان ينسى الموقف ويبدا يهوجس بسالفتك.
3.إذا جاك أحد، وحاول يستخف دمه، خلك أخف دم (وتمتنع المصالة)، واقلب الموضوع والضحك عليه، وإذا بلشت، لا يردك إلا تلفونك، كلمني وابشر بالفزعة<--أبوك ياالثقة.

خاتمة:
ورا ما نصير ناس واعين وراقين؟؟
ورا ما يصير عندنا نظام؟؟<--يصير الواحد يعرف وش له ووش عليه

أدري إن الخاتمة مالها دخل باللي قبلها، لكني قايل لكم (تحذير:متخرمات).١




تحياتي :

هههههههههههههههههههههههههههههه
ههههههههههههههههههههههههههه
هههههههههههههههههههههه
هههههههههههههههه
هههههههههههه
ههههههه

<< هذه العضوه ماتت من الضحك

مره ثانيه لاتوهق تفسك وتصلي بهم

اقتباس: ولافيه بعض الناس يتكاثرون بالانقسام الخلوي مثل حراس مدارس البنات، تجيه اليوم توه متزوج، الأسبوع الجاي تجيه، وإلى فيه بزران يلعبون بساحة المدرسة بعد المغرب، تقول ما شاء الله هذولا عيالك، متى جو؟ يقولك بين صلاة العصر والمغرب

هههههههههههههههههههههههههه

اي والله وانا بعد ملاحظه هالشي

<< لا والله

اقتباس: 2.إذا أحد سألك عن موقف، ولّا علّق، عطه سالفة طوييلة، مثل سالفة القارورة والرجال الكريم، ولا تحرير المرأة، ولا قيادة المرأة للسيارة، ولا الأسهم، والسوالف واااجد، عشان ينسى الموقف ويبدا يهوجس بسالفتك

حلوه التصريفه ذي شكلي ابطبقة بس اخاف ابلش بالسالفه ولاتقضي الابكرا خاصه تحليل المراهـ


مشكوور اخوي صالح صراحه احراج من نوع ثاني وكثر لنا من هالسوالف

ههههههههههه الله يقلع عدوك ياصالح

عجزت اسكت من الضحك وخصيصا كلمة قارورة نفسي

ماشالله عليك انت لقيت قارورتك تهقى القى بي قاروره والا ماهنا قارورتن بي هههههه

مشكوووور على الموضوع

ولاتحرمنا من هرجك اللي تسذا وانا اختك

هههههههههههه شكرا ع الموضوع يعطيك العافيـ

يعطيكم الف الف عافيه على الردود الي توسع الصدر


اختي someone
مدري دوري يمكن تلقين منا ولا منا منلفزة فوق ولا تحت


والى اللقاء نلقاكم مع لقاء اخر


تحياتي :

هههههههههههههههههههههههههههههههههههههههههههههاااي

مشكووووور على الموضوع ..

والله يعطيك العافيه..

دانو الدلوعه

ههههههههههههههههههههههههههههه

الله يقطع ابليسك ابوصلوووح مزعت بطني من الضحك


تسلم على السااالفه

احسن شي لما جاله دكتور من امتز الدكاتره ههههههههههههههههههههههههههه

والله انك رايق رووووقان ،،، مشكوووور الف شكر ،،،